公 司是非多,呢句話相信大家都認同;至於各種是非中,點都唔夠同事一齊拍拖嘅是非好講。如果你公司有同事拍緊拖,你夠膽講你一次都無講過佢哋?無他,兩位都 係同事,兩位都係大家識嘅人,咁好題材講是非,阿八姑八婆點會唔拎嚟講吖!所以戀愛第一戒,就係唔好同同事拍拖!不過,問世間情為何物?兩情若在久長時, 又點時控制得住!如果你咁「不幸」真係同緊同事一齊,請遵守以下戒律,儘量唔好成為人哋嘅話柄喇!

未開始先諗分手

係呀,同同事拍拖唔係一般拍拖,因為你要諗下分咗手之後點算,你哋要先作最壞打算,萬一分手,仲要係不歡而散,你會唔會轉工?成本如何?損失有幾大?全部都要計過度過。

通知上級

無錯,感情唔應該影響公事,但係紙包唔住火,請一定要喺閒言閒語傳到畀老細聽之前,自己主動自首,呢樣係一種禮貌一種尊重老細嘅表現,亦算係同公司坦白,乘機表明自己唔會因為同同事拍拖影響做嘢。

公司分明

常識吧,千萬咪喺公司同情人接觸太多,有都只可以係公事,更加咪畀人聽到你哋傾私人嘢,一來畀人話你掛住拍拖唔做嘢,二來話你利用工作時間處理感情事務,招人口實。

咪問同事意見

因為同事兩位都識,千萬唔好將其他同事一齊拉入你哋兩個之間嘅感情事入面,萬一將來反面分手之後,曾經畀過意見嘅同事會有尷尬情況,到時唔單止係無咗個戀人,仲無埋個同事。

咪變成習慣

萬一分手後,都千萬唔好再搵第二個同事拍拖,因為你都唔想畀其他人感覺係專搵同事「開餐」嘅Player㗎?

創作者介紹

timemini0509的部落格

timemini0509 發表在 痞客邦 PIXNET 留言(0) 人氣()